شريف رد من غير ما يعلي صوته وده اللي خلاني أستغرب. لأن القاعة الأصلية محجوزة باسم أختي، والإدارة ما عندهاش صلاحية تلغي حجزها. إنت كنت حاجز قاعة تانية في نفس الفندق، لكن قبل الفرح بأسبوع طلبت تنقل الحجز للقاعة دي، وفضلت تضغط عليهم بحجة إنك عايز أفضل مكان.

وبعدين بص ناحيتي وقال أنا آسف يا نور إنك عرفتي الكلام ده بالطريقة دي، بس واضح إن فيه حد استخدم فرحك عشان يوجّه رسالة لحد تاني. حسيت إن قلبي وقع في رجلي. بصيت لكريم وقلت يعني إنت كنت عارف إن شريف صاحب الفندق من الأول؟

وعشان كده كنت بتسأل عليه كل مرة؟ كريم سكت. وسكوته كان أقسى من أي إجابة. شريف أشار لمدير الفندق اللي كان واقف بعيد، فالراجل قرب منه ومعاه ملف صغير. شريف فتح الملف وطلع منه ورقة، وقال قبل ما أي حد يتكلم عن سوء تفاهم، أنا عندي كمان حاجة لازم تتوضح.

الأكثر قراءة الان

عملية تجميل 1منذ 5 أيامسر اختىمنذ أسبوعتقى 1منذ يوم

مدير الفندق قال بتردد يا فندم، دي نسخة من طلب تغيير الحجز، ومرفق بيها ملاحظة مكتوبة بخط الأستاذ كريم. شريف أخد الورقة وبص فيها، وبعدها ناولها لكريم. اتفضل، اقرا اللي إنت كاتبه بنفسك. كريم أخد الورقة، وأول ما عينه وقعت على الكلام، وشه اتغير.

ما كنتش محتاجة أشوف الورقة عشان أعرف إن فيه مصېبة. مدير الفندق اتكلم وقال الأستاذ كريم طلب إننا نضمن حضور مالك الفندق وقت الحفل، وقال إن وجوده مهم جداً بالنسبة له، وإنه عايز يتأكد إن فيه استقبال خاص ليه. كريم انفعل فجأة إنتوا بتتكلموا ليه بالطريقة دي؟

دي تفاصيل إدارية، وملهاش علاقة بالموضوع! شريف رد عليه بالعكس، ليها علاقة بكل حاجة. لأنك ما كنتش بتجهز فرحك، إنت كنت بتجهز مسرحية. الكلمة نزلت على القاعة كلها زي الصاعقة. حتى الموسيقى اتوقفت، والناس بقت ساكتة تماماً. كريم بصلي بسرعة وقال نور، اسمعيني، الموضوع مش زي ما إنتِ فاهمة.

أنا كنت عايز أفرحك، وكنت عايز أوري شريف إنك بقيتي مع راجل يقدر يسعدك. سألته وأنا بحاول أتماسك وإنت عرفت منين إن شريف محتاج يشوفك أصلاً؟ هو قالك إنه مهتم بيا؟ هو حاول يرجعلي؟ هو ضايقك في أي حاجة؟ ما ردش.

قربت منه خطوة وقلت أنا اتطلقت من شريف من خمس سنين، وكل واحد فينا كمل حياته. عمري ما طلبت منك تنتقملي منه، ولا حكيتلك إنه أهانني. إنت اللي اخترعت معركة محدش طلب منك تدخلها! كريم حاول يمسك إيدي، لكني سحبتها.

نور، بالله عليكي، ما تبوظيش فرحنا عشان موقف سخيف. ضحكت ضحكة صغيرة من كتر القهر وقلت أنا اللي هبوظ فرحنا؟ ولا إنت اللي حولت يومي لمسابقة رجولة بينك وبين واحد أنا ما بقيتش مراتُه من خمس سنين؟ في اللحظة دي، شريف رفع إيده بهدوء، وكأنه مش عايز حد يقاطعه.